Vegna X - S prófkjörs í NV-kjördæmi.

Kæru  vinir.

Í dag hefst prófkjör Samfylkingarinnar í Norðvestur kjördæmi.  Þetta kjördæmi og auðlindir þess skipta miklu máli í endurreisn Íslands.  Og við, fólkið,  gegnum auðvitað mestu hlutverki í þessu efni. 

Mikið atvinnuleysi er í höfuðborginni og nærsveitum hennar og margir sækja nú út á land í leit að tækifærum.  Þess vegna skiptir miklu máli fyrir þá sem búa í kjördæminu og hina sem þangað leita að  góðir möguleikar til lífsviðurværis séu til staðar. 

Þessa möguleika aukum við með því að opna hlið hafsins fyrir þeim sem vilja róa til fiskjar á okkar fengsælu og gjöfulu mið.  Það er augljóst að miklir möguleikar eru á mörkuðum fyrir krækling og þessa sprotagrein verðum við að efla og styðja. Þetta á einnig við  um þorskeldi. 

Í landbúnaði er hægt að skapa bændum meiri virðisauka með því m.a. að endurskoða afurða- og dreifingakerfið. Þá hafa möguleikar í kornrækt stóraukist, svo mjög að fróðir telja að þjóðin geti jafnvel brauðfætt sjálfa sig.  Svo er líka augljóst að tekjur kjördæmisins hafa stóraukist í ferðamennsku og enn eru þar miklir möguleikar.

Já, í erfiðleikum spyrjum við okkur sjálf: „Hvað er til ráða?“ Við lítum nú upp og sjáum mörg tækifæri í náttúru okkar en einnig í hugviti, uppfinningum og nýsköpun.  Að þessu verðum við að hlúa ásamt því að siðvæða fjármálakerfið. Lækka verður vextina, skapa grundvöll fyrir öflugan banka sem verður í eigu þjóðarinnar og hvorki til sölu né gjafar. 

Þá er okkur brýnt að innleiða aukið lýðræði og er frumvarpið um persónukjör góð viðleitni í því efni. Á meðan við byggjum upp þá verðum við jafnframt að gæta þess að það fólk sem á undir högg að sækja vegna veikinda, fötlunar, öldrunar eða annarra ástæðna falli ekki um borð.   Já, góðir félagar og vinir.Margt annað er hægt að telja upp svo sem samgöngur,  uppbygging skóla og fullorðinsfræðslu, baráttuna gegn fíkniefnaneyslu og auknu vændi en hér læt ég staðar numið.Ég lýsi því yfir að ég er tilbúinn að vinna af heilum huga að þessum málum fái ég brautargengi þitt til þess í því prófkjöri sem þú getur nú tekið þátt í.

Ég gef kost á mér í 1. eða 2. sætið á lista okkar í kjördæminu, en í þrjá og hálfan áratug hef ég lifað hér og starfað sem sjómaður, sóknarprestur, kennari, verkamaður og alþingismaður.

Að lokum hvet ég þig til að láta þinn eiginn huga ráða ferðinni, þegar þú kýst fólk til að fara með málefni þín og þinna.  

 

Með bestu kveðjum Karl V. Matthíasson

Athugasemdir

[Hilmar Gunnlaugsson, 6.3.2009 kl. 18:28]

Gangi þér vel Kalli minn.

[Barður Guðmundsson (IP-tala skráð) 6.3.2009 kl. 23:44]

Eg vildi gjarnan fa nanari skyringar a hugtaki þinu a auðlind. Er það bara fiskurinn i sjonum. Er Island ekki auðlind? Ef allir sem vilja geta farið a sjo og veitt, mega þa ekki allir yrkja landið og halda skepnur eins og þeir vilja?

Hefur þu Kalli aflað þer upplysingar hversu miklar tekjur þjoðin hefur af hrindyraveiðum, rjupnaveiðum eða lax og silungsveiðum? Eg sem sjomaður hlyt að hafa ahyggjur af þvi að tekjur minar minka eftir þvi sem kökunni er skyft i fleyri sneiðar. Eg er ekki motfallin þvi að skipta auðlindunum upp a nytt en það verður þa að eiga við allar auðlindir og þeyr sem hafa selt þær til þessa verða að skila peningunum aftur.Byð spentur eftir svari. Barður.

[Kristín Magdalena Ágústsdóttir, 7.3.2009 kl. 11:29]

Ég er ekki viss um hvað þú ert að tala um Bárður.  En sjónum verður ekki skipt upp í yfiráðasvæði ákveðinna aðila líkt og landið er augljóslega gert. En ég held að það sé mikilvægt að ríkið sjái um að úthluta kvótanum til sveitarfélaga og þau síðan til þeirra sem ætla að út á sjó til að nýta það sem þar er hægt að nýta. 

Við búum ekki úti á sjónum og því er ekki hægt að umgangast sjóinn leins og land. Landinu hefur verið skipt upp í eignarsvæði sem einhverjir hafa erft eða keypt og þau hlunnindi sem á landinu er er þeirra t.d. hreindýr, laxveiði, dúnn, rekaviður og fleira svo eitthvað sé nefnt.

En það skiptir miklu máli að auðæfi landsins sé skipt réttlátt á milli allra og það væri t.d. skanndall ef menn gætu selt vatnið sem er á jörðum þeirra. Ef það yrði að raunveruleika, eins og talað var oft um hjá sjálfst. og framsókn, þá fer ég að hafa verulegar áhyggjur.

Ekki það, þetta er auðvitað bloggið hans Kalla Matt og því er hans frekar að svar þessu en þetta er mín skoðun á þessu máli.

[Barður Guðmundsson (IP-tala skráð) 7.3.2009 kl. 17:11]

Þakka þer fyrir að viðra þinar skoðanir Kristin en eins þu segir i upphafi þa ertu ekki viss um hvað eg er að fara, skal eg þvi reyna að skyra mal mitt betur.Reyndar hefur sjonum verið skipt upp i fiskveiðilögsögur,fiskinum hefur verið skipt upp milli skipa og um það bil 1500 sjomenn hafa atvinnu af þvi að veiða þennan fisk. Eg skil stefnu Kalla þannig að hver sem er geti roið til fiskjar. það hlytur þa að fækka fiskunum sem við sjomenn megum veiða, nema Kalli ætli að fara a svig við alla veiðiraðgjöf og utryma fiskistofnunum.

Við sjomenn höfum verið að kaupa okkur veiðileifi og veiðiheimildir likt og bændur og aðrir sem vinna við að nyta auðlindir landsins.Þess vegna vildi eg fa nanari skyringu a hugtakinu auðlind, þvi hann hlitur að vilja skipta öllu upp a nytt. Vonandi að kalli utskyri þetta nanar.

[Ragnheiður Ólafía Davíðsdóttir, 8.3.2009 kl. 22:00]

Listinn er afar sigurstranglegur. Ég gleðst mjög yfir því hvernig raðaðist á hann. Kjósendur völdu rétt.

[Kristín Magdalena Ágústsdóttir, 10.3.2009 kl. 10:52]

Já, ég er nú sammála þér Bárður, auðvitað má ekki vera handahófskennt hver má veiða eða hvort eða hver veiðir. Við þurfum að hafa skikk á þessu en það má ekki vera á fárra manna hendi og þeir græði og hagnist mest á fiskinum okkar. 

Ég held að við getum borgað upp skuldir(kannski sjávarútvegsins) ef ríkið sæji um að leigja út veiðileyfi til þeirra sem vilja fiska. Ríkið á að eiga kvótann ekki almenningur.

Það er algerlega mín skoðun.

[Gústa (IP-tala skráð) 13.3.2009 kl. 11:00]

Gangi þér vel á nýjum vettvangi Karl og kærar þakkir fyrir vel unnin störf á þingi. Það er von til þess að maður eins og þú getir orðið mótvægi við þann rasisma sem þrifist hefur hjá ákeðnum aðilum í Frjálslynda flokknum og að þú getir haft áhrif þar til góðs.

Fordómar og andúð á öðrum kynþáttum er eitthvað sem þarf að uppræta og fyrst þú ákvaðst að segja skilið við Samfylkingu er gott til þess að hugsa að guðsmaður geti hugsanlega haft þau áhrif að innan Frjálslynda flokksins þrífist ekki rasismi og forpokaðir fordómar í garð annarra.

Godspeed